Rusiya Xarici İşlər Nazirliyi xarici ölkə vətəndaşlarını və diplomatik missiyaların əməkdaşlarını Ukraynada qalmaqdan və ölkəyə səfər etməkdən çəkinməyə çağırıb. Moskva Kyiv və Ukraynanın digər şəhərlərində hərbi obyektlərə qarşı genişmiqyaslı zərbələrin davam etdiriləcəyini bildirib. Bu barədə Reuters Rusiya XİN-in bəyanatına istinadla məlumat yayıb.
Redaksiya istinadla xəbər verir ki, Rusiya XİN Kyivdə qalmaqdan imtina etməyən xarici vətəndaşların və diplomatların həyatlarını ciddi təhlükəyə atdıqlarını bildirib. Nazirlik mümkün nəticələrə görə xəbərdarlığa məhəl qoymayan şəxslərin özlərinin məsuliyyət daşıdığını bəyan edib.
Moskva açıqlamasında zərbələri Ukrayna Silahlı Qüvvələrinin Rusiya ərazisində mülki əhaliyə və infrastruktura hücumlarına cavab kimi təqdim edib. Rusiya tərəfinin iddiasına görə, zərbələrin hədəfi Kyiv və digər şəhərlərdə yerləşən hərbi obyektlərdir.
Rusiya son günlər Kyiv və digər bölgələrə hava hücumlarını intensivləşdirib. Oktyabrın 3-də Moskva Kyivdə Dnepr üzərindəki körpülərdən birinə də zərbə endirdiyini açıqlayıb. Ukrayna rəsmiləri isə Rusiya hücumları nəticəsində mülki infrastrukturun da zərər gördüyünü və ölən və yaralananların olduğunu bildirirlər.
Hər iki tərəf qəsdən mülki əhalini hədəfə aldığını inkar edir. Müharibə şəraitində ayrı-ayrı zərbələrin hədəfləri və nəticələri barədə tərəflərin açıqlamalarını müstəqil şəkildə tam təsdiqləmək həmişə mümkün olmur.