Rusiya hökuməti, elektrik enerjisinə artan tələbat səbəbindən kriptovalyuta mədənçiliyinin daha iki bölgədə qadağan ediləcəyini açıqladı. Bu qərar, ölkənin enerji infrastrukturuna təsir edən amillərin qiymətləndirilməsi nəticəsində qəbul edilib.
Redaksiya məlumat verir ki, Rusiya Energetika Naziri Sergey Tsivilev, Moskvada hökumət rəsmiləri ilə keçirdiyi görüşdə bu barədə məlumat verib. Tsivilev, Sibirin cənub bölgələrində elektrik enerjisi çatışmazlığına diqqət çəkərək, İrkutskda kriptovalyuta mədənçiliyinin qadağan edildiyini və əldə olunan nəticələrə əsasən, bu məhdudiyyətlərin 2031-ci ilə qədər uzadılması qərarının verildiyini bildirib. Nazir, həmçinin Buryatiya və Zabaykalye bölgələrində də qadağanın tətbiq olunacağını qeyd edib.
Bu qərar, Rusiya Prezidenti Vladimir Putinin 2024-cü ilin avqust ayında kriptovalyuta mədənçiliyinin leqallaşdırılmasına dair verdiyi qərarla ziddiyyət təşkil edir. Lakin, bu qərar çərçivəsində, Rusiya hökumətinin müəyyən etdiyi şəxslər və şirkətlər, müəyyən edilmiş enerji istehlakı hədlərini aşmamaq şərti ilə kriptovalyuta mədənçiliyi ilə məşğul ola bilərlər. Bu addım, ölkənin enerji təhlükəsizliyini təmin etmək və elektrik enerjisinə olan tələbatı balanslaşdırmaq məqsədi daşıyır.
Fərid Əlizadə