ABŞ Nümayəndələr Palatasının üzvü Tomas Massi sosial şəbəkədə paylaşım edərək Danimarkaya istehzalı çağırışla müraciət edib. O, Tramp administrasiyasına Ceffri Epşteynə aid sənədlərin guya Qrenlandiyada yerləşdiyini deməyi tövsiyə edib və bu halda Vaşinqtonun mövzuya marağını dərhal itirəcəyini bildirib.
Redaksiya xəbər verir ki, Ağ Evin mətbuat katibi Karolin Levitt Avropa ölkələrinin Qrenlandiyaya hərbi qüvvə göndərməsinin ABŞ prezidenti Donald Trampın qərarvermə prosesinə təsir göstərməyəcəyini açıqlayıb. O, həmçinin Trampın Qrenlandiyanı əldə etmək məqsədindən geri çəkilmədiyini vurğulayıb.
Açıqlamalar Qrenlandiya ətrafında artan beynəlxalq diqqət və ABŞ ilə Danimarka arasında mövcud olan siyasi müzakirələr fonunda səsləndirilib. Mövzu həm ABŞ Konqresində, həm də Ağ Evdə fərqli mövqelərin ifadə olunması ilə gündəmdə qalmaqda davam edir.