Almaniya müdafiə naziri Boris Pistorius, ölkənin silahlı qüvvələrinin sayının artırılması məqsədilə yeni bir strategiya hazırladıqlarını açıqlayıb. Bu addım, Rusiyanın Ukraynaya qarşı davam edən müharibəsi fonunda, Avropada təhlükəsizlik məsələlərinə artan diqqətin nəticəsidir.
Redaksiya xəbər verir ki, Pistorius, "Frankfurter Allgemeine Sonntagszeitung" qəzetinə verdiyi müsahibədə, könüllü qeydiyyatın istənilən nəticəni verməməsi halında, məcburi hərbi xidmətin bərpa edilə biləcəyini bildirib. Nazir, yeni hərbi xidmət modelinin əsasən könüllülük prinsipinə əsaslanacağını, lakin ehtiyac yarandığı təqdirdə, məcburi xidmətə keçidin mümkün olduğunu vurğulayıb. Bu planın 2026-cı ilin yanvar ayından etibarən qüvvəyə minməsi gözlənilir.
Almaniya hökuməti, hərbi xidmətə dair yeni qanun layihəsini sürətlə hazırlayır. Məqsəd, ölkənin müdafiə qabiliyyətini gücləndirmək və ehtiyatda olanların sayını artırmaqdır. 2011-ci ildə məcburi hərbi xidməti ləğv edən Almaniya, Rusiya-Ukrayna müharibəsinin başlamasından sonra hərbi hazırlıq səviyyəsini artırmaq məcburiyyətində qalıb.
Pistorius, həmçinin, hərbi xidmət planının ehtiyatda olanların fəaliyyətinin bərpa edilməsi istiqamətində səyləri də əhatə edəcəyini qeyd edib. Bu tədbirlər, Almaniyanın milli təhlükəsizliyini gücləndirmək və Avropada yaranan təhlükəsizlik təhdidlərinə qarşı hazırlıqlı olmaq məqsədi daşıyır.
Sevinc Kərimova