Papa XIV Leo ABŞ seçkilərində səs verərək tarixə düşüb

Papa XIV Leo ABŞ seçkilərində səs verərək tarixə düşüb

Könül Məmmədova · Media ·

Roma Papası XIV Leo ABŞ-da keçiriləcək Konqresə aralıq seçkilərdə səs verərək tarixə düşüb. O, Katolik Kilsəsinin rəhbəri olduğu müddətdə ABŞ seçkilərində iştirak edən ilk Roma Papası olub. Vatikan pontifikin noyabrın 3-də keçiriləcək seçkilər üçün poçt vasitəsilə səs verdiyini təsdiqləyib. Bu barədə Associated Press agentliyi məlumat yayıb.

Redaksiya mənbəyə istinadən xəbər verir ki, ABŞ-ın Çikaqo şəhərində anadan olan XIV Leo seçki bülletenini İllinoys ştatında qeydiyyatda olduğu ünvan vasitəsilə təqdim edib. Vatikanın mətbuat xidməti Roma Papasının ABŞ vətəndaşı kimi seçki hüququndan istifadə etdiyini açıqlayıb.

Vatikanın bəyanatında bildirilir ki, XIV Leo vətəndaşların demokratik proseslərdə iştirakını həm hüquq, həm də vəzifə hesab edir.

Məlumata görə, Roma Papası seçki bülletenini oktyabrın 3-də sifariş edib. O, ABŞ vətəndaşı kimi daha əvvəl də seçkilərdə iştirak edib.

Əsl adı Robert Frensis Prevost olan XIV Leo 1955-ci ildə Çikaqoda anadan olub. O, ABŞ-da doğulan ilk Roma Papasıdır və Amerika ilə yanaşı, Peru vətəndaşlığına da malikdir.

Vatikanın açıqlamasına əsasən, pontifik Peruda yaşadığı illərdə də qanunvericiliyin imkan verdiyi hallarda səsvermələrdə iştirak edib. O, uzun illər Peruda missioner və yepiskop kimi fəaliyyət göstərib.

İllinoys ştatının seçki sənədləri göstərir ki, Robert Prevost 2000-ci ildən etibarən müxtəlif seçkilərdə səs verib. O, bəzi ilkin seçkilərdə Demokratlar, digərlərində isə Respublikaçılar Partiyasının bülletenlərini tələb edib.

Bununla belə, bu məlumatlar onun konkret hansı namizədlərə səs verdiyini göstərmir. Vatikan da XIV Leonun hazırkı seçkilərdə kimi dəstəklədiyini açıqlamayıb.

ABŞ-da noyabrın 3-də keçiriləcək aralıq seçkilərdə Konqresin Nümayəndələr Palatasının bütün üzvləri və Senatın bir hissəsi müəyyənləşdiriləcək. İllinoys ştatında isə qubernator və senator seçkiləri də keçiriləcək.

Qeyd edək ki, Roma Papası eyni zamanda Vatikan dövlətinin başçısıdır. Buna baxmayaraq, XIV Leo ABŞ vətəndaşlığını saxlayır və qanunvericiliyin müəyyən etdiyi qaydada səsvermədə iştirak etmək hüququna malikdir.

Onun seçkilərdə iştirakı Katolik Kilsəsinin tarixində fəaliyyətdə olan Roma Papasının ABŞ-dakı ümumxalq səsverməsində iştirakına dair ilk məlum hadisə kimi qiymətləndirilir.