Macarıstanın baş naziri Viktor Orban Ukraynanın mümkün çöküşünün ölkəsi üçün ciddi problemlər yaradacağını bildirib. Onun sözlərinə görə, bu ssenari yalnız regional deyil, birbaşa milli maraqlara təsir edən təhlükə kimi qiymətləndirilməlidir.
Redaksiya mənbəyə istinadən xəbər verir ki, Orban Macarıstanın Ukraynanın çökməsinin qarşısını almaqda maraqlı olduğunu və bu istiqamətdə fəal addımlar atmalı olduğunu vurğulayıb. O qeyd edib ki, rəsmi Budapeşt bu prosesə laqeyd qala bilməz.
Baş nazirin fikrincə, davam edən müharibə Ukraynanı gücləndirmir, əksinə ölkəni tədricən məhv edir. Orban münaqişənin uzanmasının Ukraynanın dövlət institutlarına və cəmiyyətinə ağır zərbə vurduğunu bildirib.
O, həmçinin regionda sabitliyin qorunmasının Macarıstan üçün strateji əhəmiyyət daşıdığını və Ukraynanın zəifləməsinin bu sabitliyi təhlükə altına sala biləcəyini qeyd edib.