OpenAI şirkəti süni intellektlə inteqrasiya olunmuş yeni Chromium əsaslı brauzerini istifadəyə verməyə hazırlaşır. Bu brauzer, istifadəçilərə veb səhifələri xülasələmək, formaları doldurmaq, səyahət sifarişləri vermək kimi mürəkkəb tapşırıqları avtomatik yerinə yetirmək imkanı təqdim edəcək.
Redaksiya xəbər verir ki, “Operator” adlı süni intellekt agenti ilə təchiz ediləcək bu brauzer, yalnız veb baxışı üçün deyil, həm də çoxmərhələli vəzifələrin yerinə yetirilməsi üçün dizayn edilib. “Operator” istifadəçi adından yemək sifarişi vermək və ya görüş cədvəli hazırlamaq kimi tapşırıqları öz üzərinə götürə bilir. Bu texnologiya OpenAI-nin süni intellekt sahəsindəki daha geniş ambisiyalarının bir hissəsidir.
Brauzerin istifadəyə verilməsi həmçinin OpenAI-yə istifadəçi məlumatlarına birbaşa çıxış imkanı yaradacaq. Bu, şirkətin modellərini təkmilləşdirmək üçün əlavə imkanlar açmaqla yanaşı, məxfilik və məlumatların idarə olunması ilə bağlı müzakirələri də gündəmə gətirəcək. Chrome-un hazırkı bazar üstünlüyü və reklam gəlirlərindəki rolu nəzərə alındıqda, bu brauzer Google üçün ciddi rəqabətə çevrilə bilər.
OpenAI-nin yeni aləti Perplexity AI-nin yaxın zamanda təqdim etdiyi Comet brauzeri ilə oxşarlıq təşkil edir. Hər iki məhsul ənənəvi axtarış konseptindən uzaqlaşıb, süni intellekt vasitəsilə tapşırıq əsaslı interaksiyaları önə çəkir. Bu inkişaf, rəqəmsal dünyada yeni dövrün başlandığını göstərir – istifadəçilər axtarış etmədən, süni intellektə tapşırıq verərək nəticə əldə edəcəklər.
Fərid Əlizadə