OPEC-in aylıq neft bazarı hesabatına əsasən, ötən ay neft istehsalında ən böyük azalma İraq və Səudiyyə Ərəbistanında qeydə alınıb. İraqda gündəlik istehsal 2 milyon 563 min barel azalaraq 1 milyon 625 min barelə düşüb. Səudiyyə Ərəbistanında isə 2 milyon 314 min barel azalma ilə göstərici 7 milyon 799 min barelə geriləyib.
Redaksiya məlumat verir ki, Birləşmiş Ərəb Əmirliklərində gündəlik neft istehsalı 1 milyon 527 min barel azalaraq 1 milyon 892 min barelə düşüb. Küveyt üzrə istehsal 1 milyon 369 min barel azalaraq 1 milyon 213 min barelə enib, İranda isə istehsal 182 min barel azalaraq 3 milyon 60 min barel səviyyəsində olub. Bu prosesdə Venesuela və Nigeriyada isə istehsalın artımı qeydə alınıb; Venesuelada gündəlik istehsal 79 min barel artaraq 988 min barelə yüksəlib, Nigeriyada isə gündəlik istehsal 22 min barel artaraq 1 milyon 463 min barelə çatıb.
Beləliklə, OPEC-in gündəlik xam neft istehsalı mart ayında əvvəlki aya nisbətən 7 milyon 878 min barel azalaraq 20 milyon 788 min barelə düşüb. OPEC və OPEC-dən kənar bəzi istehsalçı ölkələrdən ibarət OPEC+ qrupunun gündəlik xam neft istehsalı da eyni dövrdə 7 milyon 702 min barel azalaraq 35 milyon 55 min barel kimi qeydə alınıb. OPEC bu il və gələn ilə dair qlobal neft tələbinin artımı ilə bağlı proqnozunu dəyişməyib.
Bu proqnoza əsasən, tələbin bu il ötən ilə müqayisədə gündəlik 1 milyon 380 min barel artaraq 106 milyon 530 min barelə çatacağı gözlənilir. Tələbin bu il OECD-dən kənar ölkələrdə gündəlik 1 milyon 260 min barel artımla 60 milyon 460 min barelə, OECD ölkələrində isə gündəlik 130 min barel artımla 46 milyon 70 min barelə səviyyəsində reallaşacağı təxmin edilir. Gələn il isə qlobal tələbin bu ilə nisbətən gündəlik 1 milyon 340 min barel artaraq təxminən 107 milyon 870 min barelə olacağı proqnozlaşdırılır.