Nvidia 2025-ci ilin üçüncü rübü üzrə gözləntiləri üstələyən tarixi nəticələr təqdim edib. Şirkət 57 milyard dollar gəlir əldə edərək ötən ilin eyni dövrü ilə müqayisədə 62 faiz artım göstərib. GAAP əsasında xalis mənfəət isə 32 milyard dollar olub ki, bu da illik müqayisədə 65 faiz yüksəliş deməkdir.
Redaksiya xəbər verir ki, nəticələrin əsas hissəsi — 51,2 milyard dollar — data mərkəzi biznesindən əldə olunub. Bu göstərici əvvəlki rübdən 25 faiz, ötən ilin eyni dövründən isə 66 faiz çoxdur. Qalan 5,8 milyard dollar isə oyun, peşəkar vizuallaşdırma və avtomobil seqmentlərindən gəlib.
Şirkətin maliyyə direktoru Kolet Kress data mərkəzi gəlirlərindəki yüksəlişi hesablama gücünə tələbin artması, güclü süni intellekt modelləri və agentik tətbiqlərin sürətli yayılması ilə əlaqələndirib. Onun sözlərinə görə, təkcə üçüncü rübdə açıqlanan “AI factory” və infrastruktur layihələrinin miqyası 5 milyon GPU səviyyəsindədir.
Nvidia-nın martda təqdim etdiyi Blackwell Ultra GPU xətti xüsusilə güclü tələblə qarşılanıb. Şirkətin baş direktoru Censen Huang satışların “rekord həddə çatdığını” və bulud təminatçıları üçün GPU-ların tamamilə satıldığını bildirib. Onun sözlərinə görə, həm təlim, həm də inferens mərhələsində hesablama tələbi eksponensial formada artır.
Şirkət Çinə satış məhdudiyyətlərinin təsirini də təsdiqləyib. Kress bildirib ki, generativ süni intellekt üçün nəzərdə tutulan H20 GPU-ları üzrə “böyük sifarişlər” geosiyasi səbəblər üzündən reallaşmayıb və Çin bazarında rəqabət daha da güclənir.
Bütün bunlara baxmayaraq, Nvidia növbəti — dördüncü rüb üçün 65 milyard dollar gəlir proqnozlaşdırır. Bu, rüblük əsasda təxminən 14 faiz artım deməkdir və şirkətin səhmləri birjada bir neçə saat içində 4 faizdən çox bahalaşıb.
Mütəxəssislər bildirirlər ki, Nvidia-nın data mərkəzi gəlirlərinin oyun biznesini on dəfələrlə üstələməsi şirkətin fəaliyyət mərkəzinin tamamilə AI infrastrukturu üzərinə keçdiyini təsdiqləyir. Şirkətin rəhbərliyi isə süni intellekt sektorunda “balon” iddialarını rədd edir və yüksək tələbin davamlı olacağını bildirir.