Almaniya Kansleri Fridrix Merts ölkədə yəhudilərə qarşı hücumların təkcə dini icmaya deyil, bütün cəmiyyətə və demokratiyaya qarşı hücum sayıldığını bildirib. O, yəhudi həyatının Almaniyanın ayrılmaz hissəsi olduğunu vurğulayıb.
Redaksiya Die Zeit və dpa-ya istinadla xəbər verir ki, Merts bu açıqlamanı Berlində Xabad yəhudi təhsil mərkəzinin kampusunda keçirilən CDU rəhbərliyinin iclasından əvvəl verib. Kansler bildirib ki, Almaniyanın yəhudiləri qorumaqla bağlı tarixi öhdəliyi var.
Merts qeyd edib ki, ölkədə yəhudi icmasına qarşı təhlükələr son illərlə müqayisədə daha ciddi xarakter alıb. Onun sözlərinə görə, antisemit hücumlar, təhqirlər və divarlara yazılan nifrət şüarları Almaniya dövləti üçün ciddi xəbərdarlıqdır.
Kanslerin açıqlaması Almaniyada antisemitizmə qarşı mübarizə və yəhudi icmasının təhlükəsizliyinin təmin edilməsi ilə bağlı müzakirələrin gücləndiyi vaxtda səslənib. Berlin rəhbərliyi yəhudi həyatının qorunmasını həm demokratik dəyərlərin, həm də tarixi məsuliyyətin əsas hissəsi kimi təqdim edir.