CNN-in keçmiş jurnalisti Kris Silizza, İlon Maskın siyasətlə bağlı mövqeyinə görə özünün Tesla avtomobilinə qarşı yönəlmiş bir hadisə ilə bağlı açıqlama verib. Bu hadisə, avtomobilin bamperinə yapışdırılmış "Mask nasistdir" yazısı ilə özünü göstərib.
Redaksiya məlumat verir ki, Silizza, bu barədə özünün Substack platformasında yazıb. O, gündəlik məhsulların siyasətə cəlb olunmasının insanları "dəli etdiyini" və amerikalılar arasında siyasi uçurumu dərinləşdirdiyini bildirib. Silizza, təxminən beş il əvvəl Tesla almasından bəri keçdiyi "yolu" xatırlayaraq, elektrikli avtomobilə sahib olmağın bir zamanlar "ətraf mühit tərəfdarı-kommunist" kimi qəbul edildiyini, indi isə sağçıların simvolu kimi görüldüyünü qeyd edib.
Silizza, "Beş il əvvəl, mənim Tesla avtomobilim MAGA dünyasının nifrət etdiyi hər şeyi simvolizə edirdi. İndi isə solun nifrət etdiyi hər şeyi simvolizə edir?" sualını verib. Siyasi şərhçi, son illərdə "hər şeyin" siyasətə cəlb olunmasından narazılığını ifadə edib.
O, həmçinin bir şirkətin himayəçisi olmağın onun siyasətini dəstəkləməsinə bərabər olduğu fikrini rədd edib. Bu arqument, İlon Mask kimi şəxslərin tənqidçiləri tərəfindən tez-tez irəli sürülür. Silizza yazıb: "Nəhəng korporasiyalar həmişə 'doğru' olanı deyil, ən çox pul qazandıranı etməyə meyllidirlər." Silizza, hadisə ilə bağlı fikirlərini yekunlaşdırarkən, hər kəsi "həyatımızın hər kiçik hissəsini siyasi bir ifadəyə çevirmək" ehtirasından çəkinməyə çağıraraq, bu hadisələrin insanları "insanlıqdan daha da uzaqlaşdırdığını" bildirib.
Sevinc Kərimova