Yeni Honor 600 və Honor 600 Pro modellərinin dizaynı haqqında məlumatlar yayılıb. Bu cihazların görünüşü, xüsusilə də iPhone 17 seriyasını xatırladan elementləri ilə diqqət çəkir. Roland Quandt tərəfindən sızdırılan məlumatlara görə, Honor 600 Pro iki fərqli rəngdə, standart Honor 600 modeli isə üç fərqli rəngdə təqdim olunacaq. Maraqlı bir məqam isə, iPhone 17 Pro-nun xarakterik narıncı rənginin 600 Pro modelində deyil, standart 600 modelində istifadə edilməsidir.
Redaksiya məlumat verir ki, hər iki telefonda 6,57 düym ölçüsündə, 1.5K dəqiqliyə və 120 Hz yeniləmə tezliyinə malik OLED ekranların yer alacağı iddia edilir. Bu yeni cihazların Snapdragon 8 seriyasından olan yüksək səviyyəli prosessorla təchiz olunacağı gözlənilir.
Həmçinin, bu modellərin 200 meqapiksellik geniş bucaqlı əsas kamera ilə təchiz ediləcəyi bildirilir. Əsas kameraya əlavə olaraq telefoto və ultra geniş bucaqlı kameraların da mövcud olacağı qeyd olunur. Cihazlar 9.000 mAh tutumlu silikon əsaslı batareya ilə gələcək. 3D ultrasəs barmaq izi sensorunun da bu modellərdə istifadə ediləcəyi iddia edilir.