Google Play Store ilə bağlı antimonopoliya iddiaları üzrə əldə olunan razılaşma çərçivəsində müəyyən istifadəçilərin kompensasiya almaq imkanı yaranıb. Razılaşma Google şirkətinin tətbiq paylanması və tətbiqdaxili ödənişlər sahəsində rəqabəti məhdudlaşdırdığı iddialarının həlli məqsədi daşıyır.
Redaksiya məlumat verir ki, 2016-cı ilin avqust ayının 16-dan 2023-cü ilin sentyabr ayının 30-dək Google Play üzərindən tətbiq, abunəlik və ya tətbiqdaxili məzmun alan istifadəçilər ödəniş üçün uyğun hesab oluna bilərlər. Ümumilikdə təxminən 102 milyon istehlakçı üçün 630 milyon dollar məbləğində vəsaitin bölüşdürülməsi nəzərdə tutulur.
Qaydalarına əsasən, uyğun istifadəçilərin Google ödəniş profilində hüquqi ünvanı ABŞ, onun əraziləri, Puerto Riko və ya ABŞ Vircin adalarında qeydiyyatda olmalıdır. Minimum ödəniş məbləği 2 dollar olaraq müəyyən edilib və xərclərin həcminə uyğun olaraq bu məbləğ arta bilər.
Razılaşmaya dair iddiaların yekun təsdiqi üçün məhkəmə baxışı 2026-cı ilin aprel ayının 30-na planlaşdırılıb. Təsdiqdən sonra ödənişlərin qısa müddət ərzində PayPal və ya Venmo vasitəsilə avtomatik şəkildə həyata keçirilməsi gözlənilir.