İndoneziya Universitetinin İqtisadiyyat və Biznes fakültəsi furri tədbirlərində iş tapmağın vakansiya saytları və LinkedIn platformasından daha asan ola biləcəyini bildirən ətraflı bələdçi hazırlayıb. Bu barədə universitetin fakültəsi ilə əlaqəli Kanopi FEB mərkəzinin materialında məlumat verildiyi bildirilir.
Redaksiya mənbəyə istinadən xəbər verir ki, genişmiqyaslı makroiqtisadi və mikroiqtisadi araşdırmalarla məşğul olan Kanopi FEB-in məlumatına görə, furri festivallarında işgüzar əlaqələr qurmaq ənənəvi peşəkar konfranslarla müqayisədə dəfələrlə daha məhsuldar ola bilər.
Bildirilir ki, insanların heyvan obrazlarına əsaslanan personajlar yaratdığı və xüsusi kostyumlarla iştirak etdiyi bu tədbirlərdə potensial investor, biznes tərəfdaşı və ya işəgötürən tapmaq daha asandır. Hətta dünyanın aparıcı texnologiya şirkətlərində iş imkanları əldə etmək üçün də belə festivallarda yeni əlaqələr qurmaq mümkündür.
Bununla yanaşı, uğurun iştirakçının fursona adlanan fərdi personajından və ünsiyyət bacarıqlarından əhəmiyyətli dərəcədə asılı olduğu vurğulanır. Fursona iştirakçının özünü təmsil etmək üçün yaratdığı, adətən heyvan xüsusiyyətlərinə malik obrazdır.
Qeyd edək ki, İndoneziya Universiteti ölkənin ən nüfuzlu ali təhsil müəssisələrindən biri hesab olunur və Asiyanın aparıcı universitetləri sırasında yer alır. Universitetin İqtisadiyyat və Biznes fakültəsi isə iqtisadi araşdırmalar və biznes təhsili sahəsində fəaliyyət göstərir.