Türkiyə Prezidenti Rəcəb Tayyib Ərdoğan və İraq Baş naziri Məhəmməd Şiya əs-Sudani arasında Ankarada keçirilən görüşdə regional əməkdaşlıq və iki ölkə arasında əlaqələrin inkişafı məsələləri müzakirə edilib. Görüşdə əsas müzakirə mövzularından biri də "İnkişaf Yolu" layihəsi olub.
Redaksiya məlumat verir ki, Ərdoğan görüşdən sonra keçirilən birgə mətbuat konfransında bildirib ki, "İnkişaf Yolu" layihəsi həm İraqın, həm də bütün regionun sabitliyinə və rifahına böyük töhfələr verəcək. Prezident, Türkiyənin təhlükəsizliyinə təhdid yaradan PKK, FETÖ və İŞİD terror təşkilatlarına qarşı birgə mübarizənin davam etdirilməsi məsələsində qətiyyətli olduqlarını vurğulayıb. Ərdoğan, İraqla ticarət həcminin ötən il 18 milyard dollara yaxınlaşdığını, lakin potensialın daha yüksək olduğuna inandıqlarını qeyd edib.
Görüşdə, layihənin sürətlə həyata keçirilməsi istiqamətində atılacaq addımlar müzakirə olunub. "İnkişaf Yolu"na maraq göstərən bütün ölkələr bu strateji layihənin bir hissəsi olmağa dəvət edilib. Su Çərçivə Sazişi və qurulan əməkdaşlıq mexanizmləri vasitəsilə infrastrukturun yaxşılaşdırılması daxil olmaqla, İraqla birgə layihələrin həyata keçirilməsinə diqqət yetirildiyi bildirilib. Həmçinin, İraq-Türkiyə neft boru kəməri üzərindən neft daşınmasının bərpası kimi məsələlərdə irəliləyiş əldə etmək istəyi ifadə olunub.
İraq Baş naziri əs-Sudani isə "İnkişaf Yolu" layihəsinin iki ölkə arasında inteqrasiyanın daha da güclənməsi üçün böyük bir fürsət olduğunu vurğulayıb. Sudani, Türkiyə ilə terrorla mübarizə məsələsində əməkdaşlığa, məlumat mübadiləsinə və sınaqlara qarşı birgə hərəkət etməyə önəm verdiklərini bildirib. O, həmçinin, Fələstin və Qəzza məsələsində Türkiyə və İraqın mövqelərinin üst-üstə düşdüyünü qeyd edib.
Görüşdə müzakirə olunan digər məsələlər arasında bankçılıq, sənaye, təhsil və ali təhsil sahələrində əməkdaşlığın genişləndirilməsi də yer alıb. Tərəflər, regional təhlükəsizlik və sabitlik məsələlərini də müzakirə edərək, Suriya ilə bağlı mövqelərini dəyərləndiriblər.
Nəticə etibarilə, Türkiyə və İraq arasında əlaqələrin daha da inkişaf etdirilməsi, regional əməkdaşlığın gücləndirilməsi və "İnkişaf Yolu" layihəsinin həyata keçirilməsi istiqamətində mühüm addımlar atılmasına dair razılıq əldə olunub.
Sevinc Kərimova