OpenAI şirkəti, ChatGPT süni zəka platformasına yeni "alış-veriş" xüsusiyyətləri əlavə edərək istifadəçi təcrübəsini daha da genişləndirib. Yenilənmiş ChatGPT, artıq istifadəçilərə məhsul axtarışı aparmaq, müqayisə etmək və birbaşa alış-veriş imkanları təqdim edir.
Redaksiya xəbər verir ki, bu yeni sistem sayəsində istifadəçilər ChatGPT vasitəsilə müxtəlif məhsullar haqqında məlumat əldə edə, qiymətləri qarşılaşdıraraq daha ağıllı seçim edə biləcəklər. İnteqrasiya olunmuş alış-veriş funksiyası Amazon və digər onlayn mağazalardakı məhsulların real vaxtda qiymətlərini və mövcudluğunu da göstərə bilir.
OpenAI bildirir ki, bu yenilik süni intellektin gündəlik istifadə sahələrini genişləndirərək, həm şəxsi köməkçi funksiyasını gücləndirir, həm də e-ticarət sahəsində rəqabətə yeni nəfəs gətirir.
Şirkət əlavə edib ki, bu funksiyalar əvvəlcə ABŞ bazarında istifadəyə veriləcək və gələcəkdə digər ölkələrdə də genişləndirilməsi planlaşdırılır.
Hazırda OpenAI, istifadəçi təcrübəsini daha da optimallaşdırmaq və ChatGPT-yə digər praktiki funksiyalar əlavə etmək üçün yeniliklər üzərində çalışır.
Fərid Əlizadə