Amerikalı jurnalist və siyasi şərhçi Maks Blumental ABŞ Prezidenti Donald Trampın İrana qarşı təhdidlərini Vaşinqtonun uzunmüddətli hərbi siyasətinin davamı kimi qiymətləndirib. Onun sözlərinə görə, məsələ yalnız bir prezidentin davranışı ilə məhdudlaşmır.
Redaksiya məlumat verir ki, Blumental Trampı ABŞ xarici siyasətində “istisna” yox, sistemin daha açıq siması kimi təqdim edib. O bildirib ki, Trampın İranla bağlı ritorikası NATO-nun Yuqoslaviyanı bombalamasından tutmuş, ABŞ-ın Yaxın Şərqdəki hərbi kampaniyalarına qədər uzanan xəttin davamıdır.
Blumental xatırladıb ki, keçmiş prezident Co Bayden də vaxtilə Serbiyanın körpülərinin və neft infrastrukturunun bombalanmasını dəstəkləmişdi. Onun fikrincə, bu yanaşma indi Tramp administrasiyası tərəfindən İrana qarşı yenidən gündəmə gətirilir.
Şərhçi bildirib ki, ABŞ-da prezidentlər dəyişsə də, hərbi müdaxilə məntiqi dəyişmir. Blumentalın fikrincə, Yuqoslaviya, Qəzza və İran nümunələri Vaşinqtonun “qaydalara əsaslanan beynəlxalq nizam” adı altında ölkələrə qarşı güc tətbiqini davam etdirdiyini göstərir.
Açıqlama ABŞ-ın İranla müharibəsi, Hörmüz boğazı ətrafında böhran və Vaşinqtonun Yaxın Şərq siyasəti ilə bağlı müzakirələrin kəskinləşdiyi vaxtda səslənib. Blumental hesab edir ki, Tramp ABŞ sistemində qəza deyil, həmin sistemin daha açıq və sərt ifadəsidir.