Dünyanın ən böyük kriptovalyuta birjalarından biri olan Binance-ə qarşı həyata keçirilmiş 6,3 milyard dollarlıq kiberhücum Şimali Koreya ilə əlaqələndirilir. ABŞ-ın blokçeyn analitikası şirkəti TRM Labs hücumun arxasında Şimali Koreyaya bağlı TraderTraitor haker qrupunun dayandığını yüksək əminliklə qiymətləndirib. Bu barədə Reuters agentliyi və TRM Labs məlumat yayıb.
Redaksiya mənbələrə istinadən xəbər verir ki, oktyabrın 29-da hücum edən şəxslər Binance-ə məxsus kriptocüzdanlardan on müxtəlif blokçeyn şəbəkəsi vasitəsilə təxminən 6,36 milyard dollar dəyərində rəqəmsal aktiv köçürüblər. Vəsaitlərin böyük hissəsi təxminən 20 dəqiqə ərzində çıxarılıb.
TRM Labs hücumun texniki xüsusiyyətlərinin 2025-ci ilin fevralında Bybit birjasından 1,5 milyard dollar oğurlanması hadisəsinə bənzədiyini bildirib. ABŞ Federal Təhqiqatlar Bürosu həmin hücumu da Şimali Koreya ilə əlaqəli TraderTraitor qrupuna aid etmişdi.
Araşdırmaya əsasən, hücumdan əvvəl istifadə edilən kriptocüzdanlardan biri Tornado Cash xidməti vasitəsilə maliyyələşdirilib. Hakerlər əsas əməliyyatdan əvvəl kiçik məbləğli köçürmələrlə hücum mexanizmini sınaqdan keçiriblər.
Ethereum şəbəkəsində EIP-7702 mexanizmindən istifadə olunaraq Binance-in internetə qoşulu kriptocüzdanlarından birinə icazəsiz əməliyyatları yerinə yetirən ağıllı müqavilə vasitəsilə nəzarət əldə edildiyi bildirilir.
Binance-in ilkin araşdırması isə hücumun şirkətin DevOps mühəndislərindən birinin noutbukunun ələ keçirilməsi ilə əlaqəli ola biləcəyini göstərir. Şirkətin məlumatına görə, hücum edən şəxs bu yolla xidmət sisteminə daxil olaraq icazəsiz vəsait çıxarılması əmrləri göndərə bilib.
Birja kriptocüzdanların məxfi açarlarının sızmasına dair sübut aşkar edilmədiyini açıqlayıb. Hadisənin dəqiq texniki mexanizminin müəyyənləşdirilməsi üçün araşdırma davam edir.
TRM Labs-ın məlumatına əsasən, hakerlər oğurlanan aktivlərin dondurulmasının qarşısını almaq məqsədilə vəsaitlərin bir hissəsini digər kriptovalyutalara çevirməyə başlayıblar.
Xüsusilə USDT və USDC kimi stabil kriptovalyutalar onların emitentləri tərəfindən müəyyən ünvanlarda dondurula bildiyi üçün hücum edən şəxslər bu aktivləri ETH və BTC-yə çevirməyə çalışıblar.
Araşdırmada bildirilir ki, hakerlər USDT aktivlərinin bir hissəsini bazar vasitəçilərinə endirimlə satıb, Aave kreditləşmə protokolundan isə girov müqabilində ETH əldə etmək üçün istifadə ediblər.
Bitcoin şəbəkəsində oğurlanan 18 270 BTC-nin hərəkətini çətinləşdirmək məqsədilə vəsaitlərin ardıcıl olaraq daha kiçik hissələrə bölünməsi üsulundan istifadə edildiyi qeyd olunur.
TRM Labs-ın ilkin qiymətləndirməsinə görə, hücum edən şəxslərin nəzarətində 420 mindən çox ETH və 18 270 BTC daxil olmaqla, təxminən 2,4 milyard dollar dəyərində, emitent tərəfindən birbaşa dondurulması mümkün olmayan aktiv qalıb.
Bu arada Tether, Circle və digər blokçeyn iştirakçılarının koordinasiyalı tədbirləri nəticəsində böyük məbləğdə rəqəmsal aktivlərin hərəkəti məhdudlaşdırılıb. Binance oktyabrın 30-da yaydığı açıqlamada ümumilikdə təxminən 3 milyard dollarlıq aktivin dondurulduğunu bildirib.
Şirkət hadisədən yaranan bütün itkiləri SAFU təhlükəsizlik fondu və öz maliyyə ehtiyatları hesabına qarşılayacağını bəyan edib.
Binance təhlükəsizlik yoxlamaları müddətində vəsait çıxarılması əməliyyatlarını müvəqqəti dayandırıb. Şirkətin yenilənmiş rəsmi açıqlamasına əsasən, hesablara vəsait yatırılması əməliyyatları isə normal qaydada davam edir.
Birja hücumla əlaqəli ünvanların səlahiyyətlərini ləğv etdiyini, hüquq-mühafizə orqanları və blokçeyn analitikası şirkətləri ilə əməkdaşlıq etdiyini açıqlayıb.
Bununla belə, hücumun Şimali Koreya tərəfindən həyata keçirildiyinə dair qiymətləndirmə hələlik müstəqil blokçeyn araşdırmaçılarının nəticələrinə əsaslanır. ABŞ hüquq-mühafizə orqanları bu konkret hadisənin təşkilatçısını rəsmən açıqlamayıb.
TRM Labs və digər mütəxəssislər oğurlanan aktivlərin hərəkətini izləməyə davam edirlər. Hadisə kriptovalyuta sektorunun tarixində ən böyük oğurluq hadisələrindən biri kimi qiymətləndirilir.