Bəqayinin “supergüc” cavabı gündəm olub
İran XİN sözçüsündən ABŞ sualına qısa cavab
Bəqayi: Biz də supergücük
İran Xarici İşlər Nazirliyinin sözçüsü İsmayıl Bəqayinin jurnalistin ABŞ-la bağlı sualına verdiyi cavab müzakirələrə səbəb olub. Jurnalist ondan Amerikanın supergüc olduğunu xatırladaraq Tehranın niyə geri çəkilmədiyini və Vaşinqtonla barışmadığını soruşub.
Redaksiya məlumat verir ki, Bəqayi suala qısa cavab verərək İranın da supergüc olduğunu bildirib. O, “Biz də supergücük. Növbəti sual” deyərək mövzunu davam etdirməyib.
Bu cavab ABŞ və İran arasında gərginliyin davam etdiyi, Hörmüz boğazı və regional təhlükəsizlik məsələlərinin yenidən gündəmdə olduğu vaxtda səslənib. Tehran son açıqlamalarında Vaşinqtonun təzyiq siyasəti qarşısında geri çəkilməyəcəyini bildirir.
Bəqayinin ifadəsi İran mediası və sosial şəbəkələrdə ölkənin müqavimət mövqeyinin nümayişi kimi təqdim olunub. Açıqlama eyni zamanda Tehran rəhbərliyinin ABŞ-la münasibətlərdə güzəşt deyil, güc balansı dili ilə danışmaq istədiyini göstərən mesaj kimi qiymətləndirilir.
