Azərbaycan BMT-nin 2025-ci il üzrə Dayanıqlı İnkişaf Məqsədləri (SDG) hesabatında 167 ölkə arasında 64-cü yeri tutaraq sosial və iqtisadi göstəricilərdə sabit artımını qoruyub.
Redaksiya xəbər verir ki, ölkənin ümumi SDG indeksi 72,9 bal, spillover göstəricisi isə 91,7 bal olub. Bu nəticə Azərbaycanın son illərdə təhsil, səhiyyə və sosial rifah sahələrində davamlı irəliləyiş əldə etdiyini göstərir. Əhalinin elektrik enerjisi, təmiz su və tibbi xidmətlərə çıxışı yüksək səviyyədə təmin olunub.
Hesabata əsasən, əhalinin 100 faizi elektrik enerjisinə, 98 faizi isə əsas içməli su xidmətlərinə çıxış əldə edib. Əhalinin cəmi 3 faizi gündə 3,65 ABŞ dollarından az gəlirlə yaşayır. Uşaqlar arasında boyda qalma halları 13 faiz, artıq çəki göstəricisi isə 10 faiz təşkil edir. Təhsildə iştirak səviyyəsi 90 faizi ötərək region üzrə yüksək göstəricilərdən biri kimi qeyd olunur.
Səhiyyə sahəsində ana ölümü 100 min doğuşa görə 41, körpə ölümü isə hər 1000 doğuşa 19 hadisə səviyyəsində qeydə alınıb. Tibbi xidmətlərə çıxış 100 faizə yaxın göstəricilərlə sabitləşib. Qadınların parlamentdə təmsilçiliyi 17,6 faizədək artaraq sosial iştirakçılıqda müsbət meyl yaradıb.
Enerji sektorunda da bərpa olunan enerji payı 7 faizə yaxınlaşıb. Hökumət yaşıl iqtisadiyyat və ekoloji sabitlik istiqamətində yeni təşəbbüsləri genişləndirir.
Bu templə davam edilərsə, Azərbaycan 2030-cu ilə qədər bir sıra SDG hədəflərini vaxtından əvvəl reallaşdıra bilər. Ölkə həm iqtisadi sabitlik, həm də sosial inkişaf baxımından regionda mühüm mövqeyini qorumaqdadır.