Avropa Komissiyasının rəhbəri Ursula fon der Leyen, Pfizer müqavilələri ilə bağlı qalmaqallı ittihamlara baxmayaraq vəzifəsində qalacaq.
Redaksiya xəbər verir ki, Avropa Parlamenti Ursula fon der Leyenə qarşı irəli sürülən etimadsızlıq səsverməsini rədd edib. Səsvermənin nəticələrinə əsasən, etimadsızlıq qərarı qəbul olunmayıb və o, Avropa Komissiyasının prezidenti vəzifəsində qalmağa davam edəcək.
Fon der Leyenə qarşı bu təşəbbüs, Pfizer şirkəti ilə ümumi dəyəri 35 milyard avro olan vaksin müqavilələri üzrə şəffaf olmayan danışıqlar səbəbindən gündəmə gəlmişdi. Avropa Ədalət Məhkəməsi Avropa Komissiyasının bu işdə prosedur pozuntularına yol verdiyini təsdiqləyib. Bununla belə, Komissiya fon der Leyen ilə Pfizer rəhbərliyi arasında olan mesajlaşmaları təqdim etməkdən imtina edərək, onların “təsadüfən” silindiyini bildirmişdi.
Mühafizəkar fraksiyalar fon der Leyeni parlament nəzarətini görməməzliyə vurmaqda və idarəçiliyində avtoritar üslubdan istifadə etməkdə ittiham edirlər.
Sevinc Kərimova