Avropa İttifaqı ABŞ prezidenti Donald Trampın Qrenlandiya ilə bağlı təhdidlərinə cavab olaraq genişmiqyaslı iqtisadi tədbirlər paketi hazırlayır. Planlara ABŞ mənşəli məhsullara qarşı 93 milyard avro həcmində tariflərin tətbiqi, eləcə də Amerika şirkətlərinin Aİ bazarına çıxışının məhdudlaşdırılması daxildir.
Redaksiya FT News-a istinadən xəbər verir ki, sözügedən tədbirlər ABŞ prezidenti Donald Trampın Dünya İqtisadi Forumunun Davosda keçiriləcək toplantısı çərçivəsində planlaşdırılan görüşləri ərəfəsində Brüsselin əlində danışıqlar aləti kimi nəzərdə tutulur. Aİ rəsmiləri bildirirlər ki, bu mexanizmlər birbaşa qarşıdurma deyil, siyasi təzyiq və tarazlıq yaratmaq məqsədi daşıyır.
Məlumata görə, Avropa tərəfi Qrenlandiyanın statusu ətrafında yaranmış gərginliyi transatlantik münasibətlər üçün ciddi risk kimi qiymətləndirir. Aİ daxilində hesab olunur ki, iqtisadi rıçaqlar ABŞ-lə aparılacaq danışıqlarda mövqelərin yumşaldılmasına və kompromis əldə olunmasına kömək edə bilər.
Qeyd edilir ki, mümkün məhdudiyyətlər təkcə ticarət tarifləri ilə məhdudlaşmaya, həmçinin ABŞ şirkətlərinin Aİ bazarındakı fəaliyyət şərtlərinə yenidən baxılmasını da əhatə edə bilər. Bu addımların həyata keçirilib-keçirilməməsi qarşıdakı danışıqların nəticələrindən asılı olacaq.