Çin və Amerika Birləşmiş Ştatları arasında ticarət gərginliyi yenidən gündəmə gəlib. Bu dəfə tərəflər İsveçrədə, yüksək səviyyəli danışıqlara başlayıblar ki, bu da uzun müddətdir davam edən ticarət müharibəsinə son qoymaq cəhdi kimi qiymətləndirilir.
Redaksiya məlumat verir ki, danışıqlar ABŞ prezidenti Donald Trampın Çinə qarşı gömrük rüsumlarını artırmasından sonra başlayıb. ABŞ tərəfindən Çin mallarına tətbiq olunan gömrük rüsumları ümumilikdə 145%-ə çatdırılıb. Çin isə öz növbəsində, ötən ay Amerika mallarına qarşı 125% rüsum tətbiq etməklə cavab verib. Bu addımlar iki ölkə arasında ticarət əlaqələrini daha da gərginləşdirib və dünya iqtisadiyyatına mənfi təsir göstərib.
Görüşdə əsas müzakirə mövzularının, gömrük rüsumlarının azaldılması, ticarət balansının tənzimlənməsi və intellektual mülkiyyət hüquqlarının qorunması olduğu bildirilir. Ekspertlər, danışıqların nəticələrinin hər iki ölkənin iqtisadiyyatı və qlobal ticarət üçün mühüm əhəmiyyət kəsb edəcəyini vurğulayırlar. Tərəflərin konstruktiv dialoqa hazır olması, müsbət nəticələrə ümid verir.
Danışıqların nəticələri barədə dəqiq məlumatlar hələlik açıqlanmayıb. Lakin, tərəflərin ticarət mübahisəsini həll etmək istəyi, dünya iqtisadiyyatı üçün mühüm bir addım ola bilər. Gözlənilir ki, danışıqlar bir neçə gün davam edəcək və nəticələr ictimaiyyətə açıqlanacaq.
Sevinc Kərimova