ABŞ-ın Hörmüz boğazındakı hərbi komandirlərinə kommersiya gəmilərini və Amerika qüvvələrini qorumaq üçün geniş zərbə səlahiyyəti verildiyi bildirilir. Yeni qaydalar İranla gərginliyin artdığı və “Project Freedom” əməliyyatının başladığı vaxtda qüvvəyə minib.
Redaksiya Fox News və Axios-a istinadla xəbər verir ki, bölgədəki ABŞ komandirləri özlərini və ticarət gəmiçiliyini qorumaq üçün “lazım olan bütün səlahiyyətlərə” malikdir. Məlumata görə, ABŞ qüvvələri gəmilər üçün birbaşa təhlükə yaradan hədəfləri əvvəlcədən ayrıca siyasi təsdiq gözləmədən vura bilər.
Bu hədəflərə İranın raket buraxılış qurğularının hərəkətə gətirilməsi, raketlərin rels və ya buraxılış mövqelərinə yerləşdirilməsi, həmçinin kommersiya gəmilərinə təhlükə yaradan “fürsət hədəfləri” daxildir. ABŞ rəsmiləri bu qərarın müdafiə xarakterli olduğunu bildirirlər.
Açıqlama ABŞ Mərkəzi Komandanlığının iki Amerika bayraqlı kommersiya gəmisinin Hörmüz boğazından keçdiyini bildirməsindən sonra verilib. CENTCOM-un məlumatına görə, ABŞ Hərbi Dəniz Qüvvələrinin idarəolunan raket esminesləri hazırda Fars körfəzində fəaliyyət göstərir.
İran isə Hörmüz boğazından keçidin yalnız Tehranla koordinasiya əsasında mümkün olduğunu bildirir və ABŞ-ın hərbi mövcudluğunu regionda gərginliyi artıran addım kimi qiymətləndirir. Bu səbəbdən yeni döyüş qaydaları boğazda birbaşa ABŞ-İran toqquşması riskini daha da yüksəldə bilər.